|
|
|
|||||||
| قهوة الدكاكين للمواضيع العامه والنقاشات الاجتماعيه والاخبار السريعه |
 |
|
|
أدوات الموضوع | انواع عرض الموضوع |
15-03-2008, 02:35 AM
|
#1 | ||||||||
|
-OoO الوشمـ في عيون ابناءه ( مشارك) OoO-
* . . .  -( الوشمـ )-. . . * |
||||||||
|
|
15-03-2008, 02:37 AM
|
#2 | ||||||||
|
|
[ .. الوشم .. ] الوشم : إحدى المناطق بالمملكة العربية السعودية وقاعدته شقراء وهو منبسط من الأرض يشقه رمل الرغام وفيه بلدان وقرى .. خصب منبت منتج يحيط منطقة الوشم كل من محافظه الغاط ومحافظه الدوادمي يفصل بينهما نفود السر ومحافظه ضرما ومنطقة القصيم ومحافظة ثادق ومحافظة المجمعه ..  ------------------ نجي الان للجد .. ونتكلم عن الحب الكبير .. ( شقراء ) مدينه شقراء تقع في منطقه الوشم وبينها وبين الرياض 190 كيلو متر تقريباً (شمال قبله)  وعدد السكان اللي يسكنونها يجون حوالي 30000 نسمة وترتفع عن سطح البحر 700 متر .. سمـيت شقـراء بهـالاسـم نسبـة لاكمـة شقـراء اللـون .. هذي صورة لشقراء من قوقل ايرث: ------------------------- منول كان لشقراء موقع استراتيجي في قلب نجد وكان لها ثقل مهوب صاحيـ .. تجاريا خصوصا ايام الكدر والحجر ومن شقراء كانت القوافل تنطلق للحجاز وتسمى الهبط وتنحدر للاحساء والكويت والخليج والعراق وتسمى الحدره .. يعني باختصار هي اللي كانت تجلب البضائع والارزاق من ذيك الدير الى كافة اصقاع نجد .. ايضا تجارة شقراء ما كانت على الصعيد الاقليمي بس .. لا وصلت للهند والعراق والشام وهالمكانه وصلت للقمة يوم صارت الدولة العثمانية تجيب مندوبينها عام 1332 ومعهم الاف الجنيهات عشان يصرفونها في شقراء ويشترون بقيمتها من الريالات 30 الف بعير لانهم عارفين انهم ما يقدرون يصرفون هالجنيهات الا في شقراء و قال أحد الشعراء فيها ::: القرب من بعض المخاليق يغنـــيك *** والقرب من بعض المخاليق فقـــرا واللِّي عطا صاحبك بالخير يعطيك *** وإلى اهتوى يعطيك ميلان شقـــــراء مالك ومالْ أعلامْ تبغي تعنِّيــــــك *** وإن كنت شاطر في معانيك تقـــرا ------------------------ يوجد في شقراء عدد من الاسواق ولكن اهمها ..: 1/ سوق المجباب: سوق صغير فيه أكثر من عشرة دكاكين في وسط الديرة القديمة ولعلَّنا لو رجعنا إلى أصل التسمية لوجدنا هذا الإشتقاق قد جاء من الفعل جبّ وجبَّب بمعانية المختلفة. وقال به احد الشعراء ::: إنَّما المجباب كالهنـــد لنـا..... كلما رُمْنا به شيئاً حــــــــــــصــــــل تجد الرمان والقِثَّا بــــــــــه.....مع بيضٍ ودجاجٍ وبـــــــــــــصــــــــل 2/ سوق القطعة: هذا السوق مخصص للقصابين . 3/ السوق الرئيسي: أو السوق الكبير ويسميه أبناء البادية (( الماقفة )) 4/ سوق حليوة وقد بني بعد استقرار الملك عبدالعزيز وفي حدود عام 1350هـ تقريبا وسمي بذلك لانه كان مجاورا لبستان اسمه حلوه. ------------------------- وفيه اكلات شقراويه واجد منها : 1/ الــــدقـــس .. 2/ المثلوث أو العصيد أو الملتوت .. 3/ المراصيع 4/ الــمــرقــوق .. 5/ الحـنــيــنــي .. 6/ الــعــفــيــس .. 7/ الجــريــش .. 8/ الــقــرصــان .. 9/ الــمــخــامــيــر ------------------------- وشقراء صمدت قدام جيوش محمد علي باشا واستبسلت في الحفاظ على عقيدتها وتميزت بنجابه اهلها وعلو همتهم وطيب نفسهم وماضيهم التجاري المشهور. ------------------------- طبعا اغلب سكان شقراء من قبيلة بني زيد القبيله المعروفه في نجد اللتي يرجع نسبها الى بني قحطان .. كما يسكنها ايضا عدة عوائل من بني تميم وبني خالد .. << لبى قلوبهم كلهم .. وفيه عدة امثال شقراوية هذي جزء منها ..: × حيَّا الله الخوي. × فلان شارب من الحميضيَّة. × مايجيش قدير الحليب وعنده شقراوي. × لاتقوم من مكانك وعندك شقراوي. × لولا البقرا مارحت أقرا عند مطيويع أهل شقرا. × عطوني حقي من القران في شِقِّي. × ول عويدٍ ماأروغك. × إن طاع راجح. × مثل المنيسري إلى حْدَرَتْ الشعبان سنَّد. × إحلفي عليها ياخضراء. × إخطم لها ياسعد. × هذي عييناتي يوم أدَيِّنك. × الملح مايجلب على أهل القصب. - طـاب خـواكـم وزان ملفـاكـم - الله يابوِ لـك - فـلان صـدره اوسـع من المستـوي - من أوفـى دينـه نـامت عينـه - أبعـد عليكـ من حبـة كوعك - اللسـان مغـراف القلـب - والله وماقالت بنـت الحـايك لابـوها - لا تـاكل نـي ولا يوجعـك بطنـك - اللي ماله شي هو اللي مايضيـع له شـي - اردنا شقراء واراد الله ضرما << وهالمثل قصته قصه وهي ان ابراهيم كان محاصر شقراء وكان ناوي يخرب المدينه لانه عارف ان اهلها شدتهم وتعصبهم لدينهم ولحكومتهم .. واهل شقراء دافعوا عن بلدهم وحموها وحاربوا الباشا حتى اتفق الطرفين على الصلح وفتح شقراء بشروط اهلها وطلع من شقراء ومر بضرما وما كان يبغى يحاربهم ونزل جنبها وارسل لاهلها يبي مؤونه للجيش .. قاموا وبعثوا له صرة بارود ورصاص وقالوا ما عندنا الا هذا .. وعرف الباشا انهم يبون الحرب وحاصرهم فترة بسيطة وفتح البلدة وخرب فيها كل ما يمكن تخريبه وقال : اردنا شقراء واراد الله ضرما .. وراحت مثل . ------------------------- --{ الريـاضه في شقـراء ’ .. نــادي الـوشم .. يعتبـر نـادي الـوشم احـد ابـرز معـالم شـقراء فـ هـو النـادي الـرياضي الأول ,, نـظرا لمـا يقـدمه من خـدمـات ومايحتـويه من متطلبـات ريـاضيه ,, وقد قـام الكثيـر من اهـالي شقـراء علـى دعمـه ------------------------- اهم المعالم الاثرية في شقراء .. * السـد القـديم في شـرق البلـده عند ملتقى وادي الغدير مع وادي الريمـه * بـئر الحميضيـه غرب السـور القـديم وداخل السـور الجـديد * أبـراج المـراقبـه على الجبـال المحيطـه بالبلـده ومنهـا المرقب الشمالي والمرقب الجنـوبي والبريج السـائح * السـور القـديم ويرجـع تـاريخه الـى عـام [ 1232 هـ ] * السـور الجـديد وتـم تشيـده بعد اقـل من قـرن عـام [ 1319 هـ ] وهذي صور لمحافظة شقراء .. مدخل المحافظة للقادمين من القصيم ومرات والرياض جامع الفاضل سوق الاندلس الشلال الاصطناعي مقر البلدية احد المجسمات الجمالية التي تزين مدخل شقراء بيت السبيعي .. وهو القصر الخاص بالملك عبدالعزيز ومقر اقامته اثناء زيارته لشقراء السور القديم لشقراء .. احد المجسمات الجمالية في المحافظه ( دوار الطعس ) احد الازقة في شقراء القديمة جامع الشيخ المهنا .. طبعا وبما اننا قروب خاص بالوشم .. فلازم نذكر لكم اهم المحافضات والمراكز في منطقة الوشم .. - القصب .. تبعد عن شقراء حوالي 35 كيلو .. وتتميز بانها من اهم المناطق اللي تمد السعودية والخليج بالملح وتأتي بعدها قريات الملح .. والقصب فيها مناطق لاستخراج الملح هذي صورة فضائية لها .. سبحان الخالق اتمنى اهل القصب ما يقصرون .. بحثت في كل مكان ادور شي اكتب فيه عن القصب ولا حصلت شي .. - مرات برضو تبعد عن شقراء 35 كيلو .. واهم معالمها جبل كميت المشهور واللي قيل فيه عدد من الابيات منها : يا (كميت).. ياليتني براسك تعليت أشرف على الديرة وأطالع بناها --------------- الله.. لحد ياما على (كميت) عديت أشرف مرات ونخلها مع رباها --------- نور سطع من علاوي كميت لا قبلت.. بانت تباشيره -------------- انتهى الجزء الاول . لحد يرد لين نقول انتهى التعديل الأخير تم بواسطة عين السيح ; 15-03-2008 الساعة 02:40 AM |
||||||||
|
|
15-03-2008, 03:02 AM
|
#3 | ||||||||
|
|
مقابلة مع تاريخ .. نعم هي تاريخ .. مدرسة لازلت انهل من علمها وحبها وصفاء قلبها الطاهر .. هـي الإيثار والعطـاء والحـب الحقيقـي الذي يمنـح بلا مقابـل ويعطـي بلا حـدود أو منــّـة .. هـي البلسـم الشافـي لجروحنـا والمخفف لآلامنا .. ( أ ) اغلى انسان في دنيتي ( م ) مصدر الحب والحنان والعطف ( ي ) يا جعل يومي قبل يومها .. كان لقائي مع الوالدة اطال الله في عمرها وامدها بالصحة والعافيه .. ما كان لقاء بقدر ما كان سواليف واسترجاع لايام الماضي وراح ارتب المقابلة بحيث تكون على شكل فقرات ..بسم الله يمة كيف كانت حياتك قبل ..؟ تقول : والله كنا عايشين في شقراء والوالد الله يرحمه كان فلاح وكان الله يرحمه يوعينا يوميا بعد صلاة الفجر عشان نروح معه للمزرعه ونشتغل معه انا وخالك وباقي خالاتك .. يا نقلع بصل والا نقطع برسيم لكل وقت كننا نزرع اللييحتاجه الناس .. وياما كنا نفرح اذا جت مباراة للنصر والا الهلال .. اذا جت مباراة للنصر قعدت خالتك حصة تمطخ راس ابوي لين يخلينا نتابعها واذا جت مباراة الهلال قامت خالتك سارة وتمطخ راس ابوي لين يخلينا نتابعها .. والشغل كان متعب والا لا .. ؟ - الا والله تعب وشقى وجوع مهوب مثلكم يا عيال النعمه  .. من البطره السفرهاولها في المقلط واخرها في محطة المقرن الي قبل حريملاء والصحون تركبون سيكل عشان تجيبونها .. الله لا يغيرها علينا . هذي هي عيشتنا ولو جدك الله يرحمه عنده عيال واجد كان يمكن قعدنا في بيوتنا .. بس ما عنده الا خالك والباقي بنات .. ومع كل هالتعب كنا ندرس ومجتهدين وكنت اجيب الاولى على صفي .. الى ان تزوجت ابوك ولا كملت الدراسه .. يعني ابوي تزوجك وانتي تدرسين ..؟ - تزوجني وعمري 14 سنه .. بس 14 ..؟ - ايه .. جدك الله يرحمه قام يحسفني ويقول ترى يمكن ما يجيك واحدن غيره واخواتي كل شوي ناطتن وحده وتقول خذيه يالخبله وانا توكلت على الله ووافقت ..ويوم تزوجتي ابوي ليه ما كملتي دراستك ..؟ - من قال اني ما كملت .. كملت المتوسط .. بس صعب انك توفق بين شغل البيت والدراسة والحمل .. كان البيت كله على راسي .. مو بس ابوك لحالك .. ابوك عماتك وجدتك .. وجدتك ما تبي خدامه .. فصار الشغل كله على راسي .. وفوق هذا حامل باختك  .. بسبب هالشي بديت اهمل الدراسة .. الى ان نجحوني من المتوسط بالدف ولا كملت الثانوي .. من تتذكرين من زملاء الدراسه ..؟ - واجد بس اللي استمرت صداقتي معهم 2 بس ( الجوهره و لطيفة ) والباقي انقطعت من رحت للرياض .. مواقف تتذكرينها وما تنسينها ؟ - احد المرات في عز الشتاء .. كان الوقت ظهر .. ومن الجوع اكلت فصين بصل ..وتحاليت للدفا في السطح ورقدت وضربتني الشمس لين خاس البصل في بطني .. واقعد العصر اتلوى من بطني لين ودوني للصحيه << المستشفى .. والموقف الثاني : مرة من المرات طلعت من البيت بدون ما يدرون اهلي ورحت لم جيراننا وقعدت عندهم الى المغرب ويوم جيت البيت والى عيون ابوي في قمة راسه وطقني مع ظهري.. وهي المره الاولى والاخيره اللي طقني فيها ابوي .. الثالث : كنا في الصيف ننام في السطح وكان بيتنا ما له ستره .. وحنا راقدين كل شوي تطيح وحدة مننا في الحوش .. اول من طاح خالتك سوير .. وطيحتها قشرا وودوها للمستشفى .. وانا طحت بس طيحتي اخف بواجد لان قميصي علق في الثعبه . . وخالك طاح في حوش البقرة بس زين انه طاح على التبن والا تسان انفقش راسه حكمتك في الحياة : - شرحك شله وحلقك بله والموت اسرع من ذا كله .. وش اشهر الالعاب اللي كنتوا تلعبونها .. ؟ - فيه الخطه .. هذي اللي كنت اموت عليها ولا احب غيرها .. ليه ..؟ - بلاي دايم افوز فيها .. طيب يمه .... - شف منيب فاضية لك الحين ابروح لعمتك حصة وابطيت عليها .. اذا جاء باتسر كملت لك ان شاء الله .. يمه .. يمه .. ست الحبايب .. والمقابله .. ؟ ------------ انتهت المقابله بتصريف امي لي .. طبعا انتم بغيتوا اشياء اثريه في بيتنا .. وهذا اللي لقيته .. مكينة جدتي .. كمن بيز صلحتهن جدتي رادو الوالدة .. ---------------------------- خلصنا .. طبعا مثل ما انتم شايفين .. الفقره صايره تسنها شغل مرة ابو ومستعجله بعد .. لكن ذا الويكند انشغلت بقوة .. من معرض الكتاب للجنادرية .. همن سفرة ولا رجعت الا اليوم العصر .. بس الحمدلله اننا خلصناها .. والعذر والسموحه لعمر .. اضافني في المسن ولا دريت الا قبل شوي .. وكان من المفروض ان الموضوع ينزل 11 الليل .. بس عمر اعطاني رابط وطار الشغل كله وطابت النفس من الشغل .. لين رحت وتعشيت وعينت من الله خير ورجعت اشتغل فيه --------------------------------- طبعا اقدم اعتذار للاخ ( ouch!) ويعلم الله اني ما دريت عن اسمك انك معنا الا قبل شوي والا كان حطيت اسمك من ضمن القروب .. باقي فقرة القصب مع انا سعودية ورشة ملح وفقرة القرينه مع اوتش .. تحية خاصة من ابناء شقراء الحبيبة .. 1- عمر 2- عين السيح .. فيصل .. انا سعودية .. رشة ملح .. لكم المايك .. ---------------------- دمتمـ بود |
||||||||
|
|
15-03-2008, 04:18 AM
|
#4 | ||||||||
|
القرينه :$
*
* * ولو انكم ماحطيتوا اسمي بتصاميمكم بس اني بعتبر نفسي من ضمن عيال الوشم  هذي القرينه بالجمال تزينت .....................................هي في عيون العاشقين جنـانُ . . .  :: القـرينه :: القرينة هي تلك البلدة الصغيرة الوادعة الواقعة في أحضان وادي الشعيب المعروف قديما بوادي (قران) و من هنا جاءت تسميتها و تقع شمال غرب مدينة الرياض ع لى بعد 87 كلم يرجع تأسيسها الى حوالي مائتين سنة مضت ففي عام 1222 هـ <رقم مميز خرج أبناء سند بن علي بن عبدالله بن فطاي الاربعة (مقرن – سلطان – زومان – علي) الى القرينة فأسسوها و غرسوا نخلها و بنوا قصرها و أحكموا أسوارها و كان معهم العلامة الشيخ محمد بن مقرن الذي توفي الى رحمة الله سنة 1267 هـ وتقع القرينة في وسط شعيب حريملاء الذي يمتد حتى ملهم بمحاذاة الوادي مما يضفي عليها جمالا خاصة عند هطول الامطار و تشتهر بوفرة مياهها الجوفيه مقارنة بالبلدان المجاورة لها. :: المؤسسون :: يرجع نسب المؤسسون الاصليون لبلدة القرينه الى سند بن علي بن عبدالله بن فطاي بن سابق بن حسن بن شماس من قبيلة الوداعين  الدواسر أبناء غانم بن ناصر بن ودعان بن سالم بن زايد وٌلد لفطاي بن سابق أربعة أولاد هم عبدالله - سليمان – سيف – أبراهيم وٌلد لسند بن علي أربعة أولاد هم سلطان – مقرن – زومان – علي أهل القرينة الاصليين هم ذرية سند بن علي بن عبدالله بن فطاي وهم الاسر التاليه : المقرن الزومان العلى (المطرب)  السلطان ذرية سليمان هم الغصاب – الخيطان – الزامل ذرية سيف هم السند – الدهـاشـا – السلطان – الدواي – العوام – السيف ذرية أبراهيم هم الزيد حيث أنقطعوا فلم يبق منهم أحد :: أبرز المعالم :: تنعم القرينه اليوم بمظاهر التحضر التي عمت المملكة ومن أبرز معالمها : مركز القرينة تحت رئاسة الاستاذ علي بن محمد المطرب والمعروف بحكمته و كرمه جامع الامير سلطان بن عبدالعزيز المجاور للمركز في منطقة القصر و الذي يعتبر تحفة معمارية و يتسع لاكثر من 1200 مصلي الجمعية التعاونية حيث تمثل رمزا لتكاتف الاهالي بتوفير الاحتياجات اليومية منطقة القصر حيث حركة التنمية العمرانية على قدم و ساق مع الابقاء على الاثار القديمة مزرعة الشيخ زومان بن عبدالله الزومان في المليح حيث تقدر مساحتها بأكثر من 2 كيلو متر مربع و تمتاز بوفرة الانتاج من التمور المتميزة منطقة دخينة و هي منطقه عمرانية مقصوره على ال دعيلج و بها مسجد حديث البناء منطقة الخزيمي في أقصي الجنوب حيث تنتشر الاستراحات الجميلة على ضفاف الوادي منطقة الحلة في الشرق حيث الاصالة تمتزج مع المعاصرة المخطط الجديد في ظهرة العرقوب حيث مزرعة الشيخ عبدالرحمن المقرن ويوجد محطة لخدمة المسافرين متكاملة يملكها الشيخ حمد المقرن :: صور وتعليقـــات ::  هذا نادينا الموقر  صح ماله 9 سنين مأسس بس عنده بطولات اكثر من بطولات النثر يكفي انا كابتنهم  =====  شوارع صح لا حفريات ولا مطبـات اناقه ونظافه وفوق هذا كله هواء صحي ونقـاء ======  هذي جمعيه القرينه وهي لنا فيها كل شئ محطه بنزين وملاهي وبقالات ومحلات وحتى باسكن روبنز فيها ووهـ يازين ديرتنا  =====  كل ماتتمناه تجده تحت سقف واحد مع القرينه سيتي كل شئ متوفر .. بليله الحجـاز هذي محتكرينها حنا .. كانوا يبيعونها في الحجاز وبالقرينه توفى اللي يصلحها بالحجاز وصارت ماتباع الا عندنا فقط ================================================== =  هنا الاصـاله والبسـاطه .. بيوت لا مكيف فيها ولا تلفزيون .. عيشه بسيطه ولد فيها جدي عبدالله وجدتي < منيب معلمكم وش اسمها ==========  هذا البيت البوني مدرسه القرينه .. هذي تخرج منها علماء واطبـاء ومهندسين واخصائيين نفسيين ================================================== =  هذا المطل حق القرينه يكشف لك الديره كلها حتى شركه فرنسيه بغت تستأجر المكان عشان تسويه منتزه بس رفضنـا لان مايدخل ديرتنا غير مسلمين << الله من الصدز ================================================== =  هذا الشعيب لين جت الامطـار ماتوقف ابد .. وودك من يسبح فيها ================================================== =  هـذا السد حق القرينه كل ابودايم ممتلي وفيه امطـار  الله يزيده ولا ينقصه  ================================================== = :: صور اخـرى ::          . .. ... اتمنى انكم في النهـايه قضيتوا جوله ممتعه في ارجاء جنيف نجد ( القرينه ) واستمتعوا بالمظاهر الخلابه سلامو |
||||||||
|
|
15-03-2008, 04:01 PM
|
#5 | ||||||||
|
" " ||| القصب .. القصب مثلها مثل باقي الديـر من منطقة الوشم و نجد ,قريـه صـغيره دآر مادآآر عليها سـور طين , الين توحدة الجزيرة على يد المرحوم الملك " عبدالعزيز " .. وانتشرت التنميه أرجـاء البـلاد كل أبوها بـفضل الله , فـكسـرت طوقها وانطلقت عشـان تاخذ نصيبها من ها التنميـه .. وصـارت القصب اليوم مدينه متوسـطه تضم كثير من الدوائر الحـكوميه .. ||| موقعها .. شـمال غـرب الريـاض .. في أرض مستوية تسمى بـ " الحماده " وفي روآيه أخرى العتسرشيـه .. واذاا جيت تروح لها يا طـويل العمـر امسك طريق الدرعية ودز قدام وأمش وامش يعني ساعة ونص مع أخوك , وساعتين مع الشايب بتاعكو وعاد بتلقون لوحه ( مدينة القصـب ترحب بكم ) .. المهم أنها تبـع الريـاض , بينهـم وبينها 180 كيلو وهي بعد تبع مراكز محافظة شقراء .. .. ||| سبب تسميتها بـ القصب .. ! كـثر الحتسي في ها الموضوع , وتعددت الآرآآء في سبب التسميه ..بس أصحى شئ لقيته : - لأنها كانت تشتهر بـ زرآعـة القمـح على مـسااحاات كـبيره .. .. ||| التـعليـم .. ما كان في القصب قبل 1374 هـ تعليم نـظامي بس كانو يروحون للمـسجد ويدرسـون عند المـطوع القـرآن و الحـديث والفقه والتفسير والعلوم الدينية كـلها .. ويتعلمون بعد الحـروف الهـجائيه ويكتبون على اللوح .. آآآء إإإإي أووو , بااا بيي بووو  وها كـذا ألين يعرفون الحروف من الألف إلى اليااء .. هذا التعليم با النسبه للـ منول مره .. أما هـلحين تطورو و بنو المداارس للعيال و البنات وصار عندهم قسمين عـام وتحفيظ .. و الروضه للـ دقرش , و أللي يخـلص ثانوي يبتعث لـ شـقرآآء يدرس في كليـآتهم ,||| المـباني .. من قديم الزمـان كانت مبـانيهم بدائيه مره حتى أنهم يسوونها با الطين والتبن .. و الحـصا يسوون به البيبان أو السواري ( عمود يشيل الخـشب اللي يجي في السـقف ) .. وكـانت بسيطة ومـساحتها صـغيره .. ومساحة الدور مقسمينها لمرافق ، منها مجلس للرجال يسمونه القهوة وغرف في العليا وصفة سفلية ومصباح في الوسط ، ومصباح علوي أو تلـقون قهوة علوية يسمونها روشن .. وينومون أغلب الناس في سـطح بيتهم خاصة في الصيف ، ولا في الشتاء ينومون في الغرف السفلية أو في غرفة كبيرة تـسمى( صفه ) * أما اليوم فمـبانيهم من المـسلح , و الفلل الجديده المبنيه با الأسمنت و الحديد .... ||| أهـم الآثـار ~ 1 ) المـرقب ..يقع شـرق الديره القديـمه , ويكـون بطول منـارة المسجد وهو مبني من الطـين , على تـل مرتفع شـوي وأستفادو منه من ناحيتين كـونه يزيد في أرتـفاع المباني وثـانياً يتخـذونه لمـرآآقبة كـل الأراضي الي تحيط با القصب .. من الجـبل إلى النفود , ويعـرفون الدآخـل و الطـالع من الديره ويـقال للي يـرآقب ( سـبر ) .. 2 ) بـاب الحوطـه والرعـب ..هذا البـاب مسبب لكل من يسمع سالفته الخوف والرعـب وهذا بوابه من بوابات القصـب كثرت أفلام الرعب في هالباب والنصبات وهذي القصة الصدقيه كان هـذا البـاب عنـدهـ مسجـد وجـا أميـر القصـب يتوضا وهـو يتوضى أختـرقت رصـاصـه مـع هالبـاب وقتلـت الأمير وصـار البـاب هذا مصـدر رعـب لكـل سكـان القصـب وهجـروا هذا البـاب ولا أحد صار يمـر من عنده أو يجي معـه وسمعت أن كـل من كـان بيته هناك شال عفشه وراح لبيـت ثاني  ..||| الأسواق ~ مجلس البلد هو السوق ، وهو في القصب يسمى العبيدي يمكن نسبة لـ العبيد من الخزرج من الأنصار يوم سكنوا القصب جـايين من المدينة المنورة.. وفيه حوالي 15 دكان صغيروهي شرايح ما تزيد عرضها عن مترين ، ويالله تأخذ البايع ومـعه زبـون .. بس أكـثر البضايع يعرضونها في السـاحه , خـاصه منتجـات الزرآعه مثل الجح و القرع وغـيرها من الخـضروات و الفواكه وبعد يبيعون سمن و أقط اللي يجيبونه البدو كـل جمعه مع الغنم و البـعارين ..وعلى رغـم أن سوق العبيدي صغـير ألا أنه يشهد حركه نشـاط يوميه .. وحوله جـلسات مبنيه من الطين للـرجـاجيل يبسطون فيها سـواليف و فلة حجـاج و سـعة صـدر ويجلسون فيها طـول الوقت عـشان كـذا الحـريم ما يمرون ألا وقت الصـلاة و على عـجله بعد ..( .. السـوق في الحـاضر .. ) بما أن ديرتنا ماشاء الله كلها أسواق وماركات وكل شي ماشاء الله يوم الأربعـاء يجون التجـار وفيه براحه يجون ويبيعون هناك  وماتشوف الا الحريم تسنهم ماقد شافوا سوق كلن يترك بيته ويهج هناك .. ندعمكم بالصـور ** ** ** * عـاد ماصورنا لكم الحريـم اللي تسنهم ذبان على الأشياء  ..خوفاً من نعلتن تلخنـا أو لعنتن تخدش مشاعرنا .. ريـم استلمـي المـآيـك .. |
||||||||
|
|
15-03-2008, 05:22 PM
|
#6 | ||||||||
|
. . ||| أعـمال السـكان ~ إلى وقـت قريب كان العمـل السـائد في القـصب الزراعه ويشتغل في ها الشغله تقريباُ 90 % من السكان , والبـآقي في التجـآره ولا بعضهم في إنتاج الملح , وما ننسى الحـرمه كان لها دور في مساعدة الرجل اللي يشتغل في الزراعه كانت تقوم بأعمال متصله با الزراعه مثل الحصاد والتعشيب ( تخليص الزروعمن النباتات الطفيليه ) .. أو تهتم با الغـنم والبعاريـن تعطيهم أكلهم ولا تحلبهم وغـيره من الأشياء اللي تخصهم ,أما الحـين في الوقت الحاضـر يشتغل السكان في الوظائف الحكوميه والقله يشتغلون في التجاره وإنتاج الملح , وتبدل الوضع با النسبه للحـرمه فصارت تشتغل في الوظائف وخاصة التعليم .. ||| إنتـاج الملـح ~ " بلدنا تنتج الملح الزيّن من زينـه تشهد علينا الأجناب وتسثيراً من الأشيـاء ما تتم إلا والملح فيها "يعني لو أننا طقت بروسنا مانصدر لكم  تسان غداكم صار خانس وكل شي يطلع ماله طعم يعني أحمدوا ربكم واشكروه كل دقيقه وثانيه اننا للحين نصدر لكم  , أهـم إنتـاج القصب الذهـب الأبيـض ( الملــح ) عااد هو الوحيد اللي ماغلّوا سعـرهـ ليومـك هذا وهو سعـره واحد ماتغيـر هم ودهم يغلونـه بس عشانه متوفـر بكثـره قالوا أصبـروا اليـن يقضى ومايبقى إلا شـوي ونغلـي ,نجـي وشلـون يصلحـون الملـح الخشـن كل شي عندنا بشغـل اليـد ما هنا مصانع ولا شي أول شـي : يختـارون أهـل الخبـره أرضٍ زينـه تصلـح أن يصيـر فيها ملـح أبيـض زين ثـاني شـي : اذا لقو الأرض الزينـه يروحون يقلعـون التـراب في عمـق ثلاث أمتـار أو أربعـه عـاد على حسب الميـاه الجوفيـه وعاد ذا الخطوه يسوونها عشان يسحبون المويـه اللي من جوا بالمضخـات ويوزعـونه على بـرك جنـب الحفـره اللي أستخرجنا منها المويه ويسمون الحفـره ذي ( عيـن الجفــر ) ثالث شـي : يسوون عدد من البـرك طبعا يكون عمقها قليل ماتصل متـر أو متـر ونص وعاد وظيفة هالبرك يعرضـونها لشمـس عشـان تتبخـر المويـه واذا تبخـرت المويه يتركـز الملـح ويصيـر طبقه فوق طبقـه وعاد يراقبونها ليين تصيـر كنـها غطـاء ثلجـي وجليـد متماسـك رابـع شي : عاد مايبقى الا التجفيف النهائي وهذا يتطلب نقـل المـلح من البركـه لـخارجهـا ويحطونه على شكـل ( أكـوام ) وعاد على حسب حرارة وسطوع الشمـس تكون المده اللي يجف فيها الملح .. تصديـر الملـح خـارج القصـب .. ,بعـد مايجـف يبـدون يحطـونه بأكيـاس وينقلونه بشاحنـات وهذي صوره عشـان تكون أوضـح أو يمكـن أنهم ينقلـون الملـح لقلابيات بدون مايكون مكيّس وعـاد يودونـه للمصنع ويصيـر ملـح ناعم ويحطونـه في علـب .. نجـي لحـدث ثـاني هم يقـولون أنه صدز وليومك ذا وانا منيب مصدقته ||| شعيب المدقّه .. من زمان قد جى غزو من تركيا أتوقع انه بقياده باشا حق المصاريه المهم حـاصروا القصـب وسكروا أبوابها  وطبعا مزارع الناس واشغالهم كانت كلها برى القصب وكـان من قبـل دايم العـرب ما تتعرض للحريـم والمبزقـه فكـانوا الرجاجيل يطّلعون الحريـم ويزينون اشغالهم ويرجعون ملـّو هالأتراك وقالوا لازم نسـوي شي أجرامـي  وسـوو خطـه , ويوم جو يطلعـون الحريـم كالعاده قـتلو الحـريم كلهم تقريبا حوالي 70 حـرمه فتعـاهدوا هالرخوم رجالنا من شفتهم يخلون حريمهم يطلعون وأنا داريتن أنهم رخوم أنهم يطلعون واللي يقدر ينحـاش ينحـاش واللي ينقتل الله يرحمـه ويوم راحوا ذا الغزو اللي انحـاشوا رجعـوا وحطـوا هالحريم اللي انقتلـوا في مقبرة سمّـوها ( مقبـرة الحريـم ) .. .. ||| الألـعـاب المصـاقيـل : وماضنتـي أحد مـايعرفهـا ..مسـاك : هـي اللي يسمـونها الحبشـه الحين  الدنـانـه : وهذي لعبـه للبنـات يسوون عرايس ويحطونها في كرتون يقالهم ان هالكرتون البيت ويقسمونه غرفه وحمام ومطبخ وكلش ..صـرقاعه : تكون من سـعف النخل ويقطعونها من الجنب و الوسـط ثمن يعطونها البزر يقرقع بها .. يعني مشروع إزعـاج لا أقل ولا أكثر .... ||| الأمثـال ..فيه أمـثال وش كـثرهـن بس أنا بنزل لكم الي جـاز لي ..1 ) أصخـنا المـاء , وطـاار الديك .. 2 ) أمـر الله شـق القربه .. 3 ) أمـا سـرآجين وإلا ظـلما ! 4 ) أمـا حبا ولا برك وإلا مشى با النوطـزه ! 5 ) أعـوج من ذنب الكـلب .. 6 ) البندق العوجا فيها رمـيه .. 7 ) بـليس يعرف ربه .. 8 ) حـرك تبلش .. 9 ) عـصافير في سـدره .. 10 ) الي ما يخـاف من الله خـف منه .. 11 ) يولم العـصابه قبل الفلقه .. وخـلصت ..أي أحـد صعب عليه فهم مثل ولا ودهـ يعرف متى ينقال لا يتردد أو يستحي من السؤال ||| بعـض المـصطلحـات القصبيه ..تلفز= توزي ترّوح = تشم أيتب = جب معك يواسي = يرتب ساد= تستاهل مزدي = أيضاً بمعنى تستاهل ماجاك يديور = يلف يبترم = يدووور هج الباب = افتح الباب ناه = شاهـــد هاو = اداة تعجب أيت = تعال ني نروح = سنذهب تواطنه = اي تحبه أسعد الله = يعني ياليت مهوب صيدي = يعني مهوب قصدي فيدي = بتاعي حقي الربعة = الزاوية يا هيش = يا إمرة ( يقصد زوجته ) والله الرومانسية عند شيابنا  .كبن ديا = كبر ذا ضربش = عند التعجب لعطبو = تقال بدل من اللعان مثلا لعطبو اصلك يدودي = يدور فوق راسك مثل دوران الذباب درويت = در وتـعال ||| مقتطفـات من القصب الحـديثه بـرج إيفل ..مسـجد جامع ..يمديـكم على كشخة سياراتنا  بقـآله الحديـقه الجديده ,وبــس التعديل الأخير تم بواسطة أنا سعوديه ; 15-03-2008 الساعة 05:31 PM |
||||||||
|
|
15-03-2008, 05:42 PM
|
#7 | ||||||||
|
|
" " ||| مقـابله من طـرآآز آآخـر ,هما لقيـت جـدي لحيلاته في " الصـاله " ..وانا اللي ماصدقت واطب عليه واقول له أحتـس .. عن عيدكم من زمان في القصب ,ومير ( يعـدل جلسته ) ويقول ايييييه يامنول ياهي ايام ماتنعاد ..ويقوم يهـرج ويقول منول ايام العيد كان كل واحد يفتح بيته , ويحط له سفرتن هذي طولهـا جريش ورز ولحم وقرصان وكلش وياكان فيه وحدتن " الله يذكرها بالخير " جريشها يهبل من زينه المهم وكنا نطلع ونلعب وكلن مستانس ,وعيديات رايحتن جايه وكلن فاتح بابه لزوارهـ وكلن لابس ازين ماعنده اما الحين الله ياكافينا شر الفتن بس كلن مصكك على رويحته ! ولحدن يطلع ولا يسلم على أحد ! يامسافرين يتعيدون برى ديرتهم والا في المنتزهات والأسواق ..ويجيك واحد طااير ويخرب علينا الجلسه , ويقوم يهرج مع جدي ترى مهوب عمـي ابد ..من شفته جاي مدرعم ويسولف معه عن شي خاص " منيب معلمتكم وش " مير وأفحط واكتب كل الحتسي اللي قاله في دفترمدونتي من أبو ريالين من دون أسيام بعد .. |
||||||||
|
|
15-03-2008, 06:03 PM
|
#8 | ||||||||
|
|
" " ||| آآخـر المـطاف , وفي الأخـير لا يسـعنا الا نشـكر كـل من بثرناه في فقرة القصب وهم : - المصممه القديره ( أصـايل ) ,و الطيوبه مره ( بنك دريم ) ..و الجنديان المجهولان (الهنوف , ندى ) الي لولا الله ثم هم كـان الموضوع طـلع حـوااقه .. ونشـكر أيضا " فيـصل و عـين السيح و أنلي مي " على تعـاونهم معنا في طرح الوشم بعيوننا .. ولهم مني احـلى صفقه " و الشـكر كـل الشكر لكم أنتم يا من خـلف الشااشات على إعـطائنا جـزء من وقتكم لـقرآآءة المـوضوع .. " سبـحـانك اللهم وبحمدك أشهد أن لا إله الا أنت أستغفرك وأتوب إليك " .. " التعديل الأخير تم بواسطة رشة ملح ; 15-03-2008 الساعة 06:24 PM |
||||||||
|
|
15-03-2008, 06:19 PM
|
#9 | |||||||||||||||
|
..
حلوهـ الحركه .. تقلدون الجـبل الأخضر اللي في ابهـا .. " اقتباس:
يعطيكم العافيه .. " اقتباس:
جنان اجـل .. اقتباس:
اكيد نظـافه واناقه .. مافيها احد .. اقتباس:
هههههههههههههههههههههههههههههههه يعطيك العافيه ياولد جنيف .. " اقتباس:
هههههههههههههههههههههههههههههه ههههههههههههههههههههههههههههه الله لا يحوجنـا .. اقتباس:
ههههههههههههههههههههههههههههههههههههه من اسمهـا واضح انها صرقع وازعاج .. اقتباس:
المثل الوحيـد اللي فهمته .. انا سعوديـه / رشة ملح .. يعطيكم الف عافيه .. وماسوينا شي تستاهلون .. .. |
|||||||||||||||
|
|
16-03-2008, 12:46 AM
|
#10 | ||||||||||
|
.. ياهـلاا والله بـ اهـل الوشـمـ .. .. .. شقـراء من الصـور احسهـا مـره مرتبـه .. ونظيـفه .. .. عيـن السيـح .. اونـلي مي .. يعطيكم العافيـه ..  / فيصـل القـريه هـاديـه .. مـافي ولا صـوره فيها سياره ولا نـاس ولا شي .. .. يعطـيك العـافيه .. ./ وصـلنا لبنـات القصـب .. وش اخبـاركمـ .. !.. اقتباس:
.. ههههههههههههههههههههههههههههههه خـوافيـن .. . .. اقتباس:
مافهمـت ولا واحـد .. .. انا سعوديـه .. / رشـه " ملح " ابـدعتـوا .. يعطيكمـ العافيـه .. .. مـا سوينـا شيء تـرى .. و مـاشاء الله عليكمـ كلكمـ.. فـالكمـ البيـرق .. .. |
||||||||||
|
|
16-03-2008, 07:25 PM
|
#11 | ||||||||||||||
|
.
. مساء الخير جميعا .. حيا الله اهل الوشم كلهم .. شقراء .. وما ادراك ما شقراء .. تونا يوم الخميس ناشبة لنا شقراويه .. ياحبي لها بس .. ان شاء الله ناويه اروح لشقراء في العيد .. يمدحون عيدهم وناس كثيرين عازميني هناك .. اقتباس:
الله يخليها لك يارب .. اقتباس:
ههههههههههههههههههههههههههههههههههههههههههه ههههههههههههههههههههههههههههههههههههههههههه ههههههههههههههههههههههههههههههههههههههههههه <-ماتت ضحك .. اقتباس:
ياربيييييييييييه .. ههههههههههههههههههههههههههههههههههههههههههه ههههههههههههههههههههههههههههههههههههههههههه مقابله خطيره .. سلم لنا ع الوالده والله يطول بعمرها يارب .. القرينه .. احلى الشي الانساب عرفت كم عياله اثرهم منها .. <-صباح الخيرالقصب .. اقتباس:
اقتباس:
اقتباس:
ههههههههههههههههههههههههههههههههههههههه ياحركات .. كل ابناء الوشم وما حولها .. ما قصرتوا موضوع متكامل ماشاء الله .. عساكم ع القوه .. |
||||||||||||||
|
|
17-03-2008, 03:51 AM
|
#12 | ||||||
|
.. والنعم والله باهل الوشم عافاكم ربي ماقصرتو |
||||||
|
|
17-03-2008, 10:21 PM
|
#13 | ||||||||||||||||||
|
.. يالثماوي يالثماوي الحين اللي شاق سديـر شق هو الخـط السريع ولا اتوهم .. ! اقتباس:
اللي حليب وبصل ومدري وشو الله يكرم النعمه احلى شي تشوفين شايب ياكله وهو جوعان اقتباس:
يا الزحيــف انتم اقتباس:
مب يم كوره " مصارعه الأقزام "مطيحين عندها جدانـي اقتباس:
العكرشيــه  .. ! وشسمه ذا الشي نكشت فيه يقالنـا ومانروح الا يمين الخط يحسون اهلي ان الكشته يسار الخط مهوب عكرشيـه .. انتم وش يومكم سوق الثلاثاء ولا السبــت اقتباس:
الله من البربسه بعاااااد .. نوير من ذابتـس فيـذا اقتباس:
احتج .. مهوب انتم لحالكم كلنا سوا  ..اقتباس:
هيت .. مهوب ايت .. !يعني لا دقيتي على بنات خالتتس وقلتي هويتو اسهرو عندنا اقتباس:
تخمني كثير واحب اسولف بهالطريقه ..احلى فقره وربـي ولا تهون الأيقونات اقتباس:
ترى مهوب بس الشيّاب .. يعني اول مره يناديك بأسمك لا اعرستي همن ام فلان همن مصيرتس مصير امتس وامها .. ياهيش هيـش / كلمه تهضم حقوق المره كثيرآ اقتباس:
ههههههههههههههههههههههههههههه ياعمري هم لحد يسأل ليه انا عن نفسي اشكركهم شوووكرآ كثيرآ يعطيكم ربي الف عافيه شي مره اناااصه بنات القصب عمل خنفشاري .. ننجي نخطبكن هماااه / تزهّبن .. التعديل الأخير تم بواسطة أوووب صاحيه ; 17-03-2008 الساعة 10:30 PM |
||||||||||||||||||
|
|
20-03-2008, 11:07 AM
|
#14 | |||||||||||||||||||
|
|
, .. اصـآيـل .. اقتباس:
محتآجيـن محتآجيـن ,اقتباس:
نـورتـي اصايـل .. ,, .. بـنك .. اقتباس:
.اقتباس:
ابـو التحطيـم بس يا الله بشرحهم اقتباس:
فـآله لناصـر حياتس بنـك .. , محآسبه .. مس بلو .. منـوريـن بطلتـكم ,, .. اووبـه .. اقتباس:
يا الذّهـري يا الذّهـري اذا عرفـتي وشو تعالي علمـيني اقتباس:
هههههههههههههههههههههههه نفـس حالتنا بـس يمينا غيـر يمينكم نصـير جايين من القصب ويطلع يمينكم على يسارنا ما نكشت فيه ذا على اليسآر اقتباس:
لالا سـوق الإربعاء عشان يمدي اهـل الرياض عليه اقتباس:
< ..اقتباس:
الا ايـت انا متأكدهـ يمـكن انتم غيـرنا ,اقتباس:
عيـونتس الخنفشـاريه  ابـد هـه عند زلفة الباب منورتنا اوبـه التعديل الأخير تم بواسطة رشة ملح ; 20-03-2008 الساعة 11:20 AM |
|||||||||||||||||||
|
|
20-03-2008, 12:14 PM
|
#15 | |||||||||
|
اقتباس:
يعافيكم ربي وعسـاكم على القوه |
|||||||||
|
|
| أدوات الموضوع | |
| انواع عرض الموضوع | |
|
|
 |
العرض العادي
